DED Nyasa atembelea Miradi ya Maendeleo Kata ya Kingerikiti na Tingi

Posted on: March 31st, 2022

Mkurugenzi Mtendaji wa Halmashauri ya  Wilaya ya Nyasa ndugu Jimson Mhagama, Tarehe 31.03.2022 amefanya ziara ya kutembelea miradi ya Maendeleo inayotekelezwa katika Kata ya Kingerikiti na Tingi, Tarafa ya Mpepo Wilayani Nyasa.

Katika Ziara hiyo aliambatana na Afisa Mipango wa Halmashauri ya Wilaya ya Nyasa Ndugu Jabir Chilumba na Mhandisi Ujenzi Chacha Nkoba.

Akikagua miradi hiyo amepata fursa ya kuongea na viongozi wa Kata,Vijiji na Kamati zinazotekeleza miradi hiyo ili kubaini changamoto zinazowakabili, wakati wa Utekelezaji wa Miradi hiyo ili aweze kuzitatua.

Akiongea na wananchi  wa kata za Kingerikiti wakati akitembelea Ujenzi wa jengo la Upasuaji, na Jengo la Mama na Mtoto ambao ujenzi wake uko hatua ya Msingi, wananchi hao wamempongeza Mkurugenzi huyo kwa kusimamia miradi ya maendeleo na kutatua changamoto zinazowakabili wananchi na kuwa karibu nao muda wote.

Aidha Mkurugenzi amewataka wananchi hao kutekeleza Mradi huo kwa viwango na kwa muda uliowekwa ili uweze kukamilika kabla ya Juni 30 mwaka huu ili uweze kutoa huduma kwa wananchi.

Katika Kata ya Tingi, ametembelea  Ujenzi wa Zahanati ya Lulimbo ambao uko hatua ya ukamilishaji na Katika Kijiji cha Malungu ametembelea Zahanati ya Malungu ambayo iko hatua ya Ukamilishaji  pamoja na ujenzi wa madarasa ya Shule ya Msingi Malungu na Ujenzi wa Vyoo katika Shule ya Msingi Tingi.Akiongea na wananchi wa kijiji cha Lulimbo na Malungu wananchi hao walimwambia Mkurugenzi kuwa  wanampongeza kwa kazi nzuri ya kutatua changamoto iliyokuwa inawakabili.