DED Nyasa awataka maafisa maendeleo kuwahamasisha wananchi kuchukua mikopo

Posted on: October 28th, 2024

Mkurugenzi wa Mtendaji wa Halmashauri ya Wilaya ya Nyasa Bw. Khalid Khalif amezitaka Kamati za huduma za mikopo ngazi ya kata  kusimamia suala zima la utoaji wa mikopo,  kwa vikundi vya wanawake, vijana na watu wenye ulemavu, kuanzia hatua ya uundaji wa vikundi sambamba na uibuaji wa miradi pamoja na kufuatilia miradi inayoenda kutekelezwa ili iweze kuleta tija katika kufanikisha dhana inayotarajiwa ya kuwainua kiuchumi.

Ameyasema hayo hivi karibuni katika mafunzo ya kuwajengea uwezo kamati hizo ili ziweze kutekeleza kazi zake kikamilifu

“Utoaji wa mikopo hii ni utekelezaji wa sera, mikakati na mipango ya taifa katika kupunguza umaskini, kwahiyo tunapoenda kutoa mikopo hii tukalenge katika kupunguza umaskini na si vinginevyo”,

Kupitia mafunzo haya wajumbe wa kamati hizo wamepitishwa katika muongozo na kanuni za utengaji, utoaji na usimamizi wa mikopo ya vikundi vya wanawake, vijana na watu wenye ulemavu katika mamlaka za serikali za mitaa ya mwaka 2024.

Akifafanua juu ya muongozo na kanuni hizo, Bi Stamil ngongi ambae ni Mratibu wa mikopo kwa vikundi Wilayani hapa, amesema kuwa, zoezi la utoaji wa mikopo kwa vikundi litafanyika kielektroniki kupitia mfumo wa maombi ya mikopo na kwamba kikundi hakitaruhusiwa kuomba mkopo mpya kama kina deni la zamani.

Aidha Bi Stamil amefafanua zaidi kwa kusema kuwa kutakuwa na kamati za utoaji wa mikopo kwa ngazi za mkoa, wilaya na kata na kwamba utengaji, utoaji na urejeshaji wa mikopo utafanyika kwa utaratibu wa 4;4;2 kwa maana ya kuwa asilimia nne kwa wanawake, asilimia nne kwa vijana na asilimia mbili kwa watu wenye ulemavu

Akifunga mafunzo Mkuu wa Wilaya ya Nyasa Mhe. Peres Magiri  amewataka Maafisa Maendeleo ya Jamii kuwahamasisha wananchi ili waombe mikopo ya asilimia 10 kwa mwaka wa fedha 2024/2025.

Kamati ya huduma za mikopo ngazi ya kata inaundwa na mtendaji wa kata, afisa maendeleo ya jamii wa kata, afisa ustawi wa jamii, afisa elimu kata, maafisa ugani wa kata, watendaji wa mitaa ya kata husika pamoja na polisi kata.