Ded Nyasa awataka wauguzi kutoa huduma Bora

Posted on: May 26th, 2024

Yaliyojiri Maadhimisho ya siku ya wauguzi,Wilayani Nyasa.

Halmashauri ya wilaya ya Nyasa, tarehe 25/05/2024 imeadhimisha siku ya wauguzi, maadhimisho yaliyofanyika katika Hospitali ya wilaya ya Nyasa kwa wauguzi kufanya matendo ya huruma,kuwaona wagonjwa na kuwapa zawadi mbalimbali.

Mgeni rasmi katika maadhimisho haya ni Mkurugenzi Mtendaji Wilaya ya Nyasa Bw.khalid Khalif.

Akizungumza katika maadhimisho haya, bw.Khalifamewapongeza wauguzi kwa kwa kuitekeleza vizuri majukumu yao, na  kuwataka wauguzi kufanya kazi kwa bidii na kutoa huduma Bora kwa wananchi, Ili kutatua changamoto ya Afya na kuboresha sekta hiyo katika ngazi ya wilaya, mkoa na Taifa kwa ujumla.

Amefafanua kuwa kazi ya uuguzi ni kazi nyeti, ambayo inasimamia Afya, hivyo Kila muuguzi anatakiwa kusimamia kiapo chake, kwa kutoa huduma Bora kwa wananchi, Ili wawe na imani na Serikali  katika sekta ya Afya.

Ameongeza kuwa Serikali imefanya maboresho makubwa katika sekta ya Afya, kwa kujenga miundombinu ya majengo na Kununua Vifaa Tiba, hivyo basi wauguzi kama watoa huduma wanatakiwa kutoa huduma Bora Ili lengo la Serikali litimie.

Ametoa wito kwa wauguzi kuchapa kazi kwa bidii wakati Serikali inaendelea kutatua changamoto zinazowakabili.

Aidha amesema Wilaya ya Nyasa inaendelea kutatua changamoto za watumishi wa sekta ya Afya kwa kuomba kibali Cha kuajiri wauguzi na kujenga hoja ya watumishi wasiopandishwa madaraja kwa muda mrefu wapandishwe kwa mseleleko, pamoja na kuwalipa wauguzi masaa ya ziada watumishi hao, na amewataka wanajamii kuanzisha miradi ya Ujenzi wa nyumba za wauguzi Ili Serikali ikamilishe.

Awali wakisoma risala yao  kwa mgeni rasmi, wauguzi wamesema wanachangamoto ya kuchelewa kupanda Madaraja, upungufu wa nyumba za wauguzi,na kutolipwa masaa ya kazi ya ziada changamoto ambazo zimepokelewa na Mkurugenzi Mtendaji na kuahidi atazitatua.

Katika maadhimisho haya shughuli mbalimbali zimefanyika ikiwa ni pamoja na maandamano,ya wauguzi kutoka Nangombo mpaka Hospitali ya wilaya, kuwasha mishumaa kuonyesha upendo kwa wagonjwa na kuona wagonjwa na kuwapa mahitaji mbalimbali kama vile sabuni.