HALMASHAURI YA NYASA YASHUSHA NEEMA KWA VIKUNDI 3 KATA YA LIPINGO

Posted on: August 19th, 2018

Halmashauri ya Wilaya ya Nyasa leo imegawa mbolea mifuko 122 yenye thamani ya Tsh. 6,295,200/= kwa vikundi vya kilimo cha umwagiliaji vya akina Mama na Vijana wa kata ya Lipingo kwa ajili ya kuwawezesha kiuchumi ili kuinua kipato cha wakulima wa kata hiyo.

Kaimu Mkurugenzi wa Halmashauri ya Wilaya ya Nyasa ambaye ni Afisa Kilimo, Umwagiliaji na Ushirika Ndg. Morton A. Msowoya amegawa mbolea hiyo leo katika Ofisi  ya Afisa Mtendaji Kata ya Lipingo kwa kuwataka wakulima hao kutumia mbolea hiyo kwa malengo ya kuweka kwenye mpunga wa kilimo cha umwagiliaji kama ilivyopangwa.

Kaimu Mkurugenzi huyo alifafanua kuwa Halmashauri imeona  juhudi za serikali ya awamu ya tano kwa sehemu ya asilimia kumi ya mapato yake kupelekwa kwenye vikundi vya akina mama na vijana, leo hii Halmashauri imetekeleza agizo la Serikali kwa kuwaletea  mbolea mifuko 122 ya Urea na CAN ili kuboresha maisha ya Vijana na akina Mama wa vikundi vitatu vya Kata hii ya Lipingo

Akavitaja vikundi vinavyopewa mbolea hizo ni Mamanilee kikundi cha akina Mama kinachotoka Kijiji cha Lundo, Kikundi cha vijana cha Mwongozo kutoka KIjiji cha Lundo na Upendo Kikundi cha akina mama toka kijiji cha Ngindo vyote Kata ya Lipingo Wilayani hapa.

Akaongeza kuwa nimeiona mbolea na nimekagua ni nzuri na iko salama hivyo inatakiwa iende mashambani ili ikarutubishe mimea na kuongeza mapato ya kilimo cha umwagiliaji katika kata hii. Na kwa kuleta mbolea hii tunawakopesha mkopo wa mfuko mmoja mmoja na mtalipa ndani ya mwaka mmoja hivyo mna kila sababu ya kuongeza juhudi katika kilimo hicho cha umwagiliaji.

Halmashauri ya Nyasa imedhamiria kuboresha kilimo cha umwagiliaji kwa kutoa mikopo ya pembejeo za kilimo na kuongeza kwa kujenga miundo mbinu ya umwagiliaji. Tayari Wilaya ya Nyasa ina Skimu sita za kilimo cha umwagiliaji ambazo ni Kwambe iliyopo Kata ya Chiwanda, Kimbande-Mbambabay, Nyomboka-Lipingo, Lundo-Lipingo, Nkalachi-Liuli, na Ngingama-Linga.