HALMASHAURI YA WILAYA YA NYASA KUGAWA MBOLEA KWA VIKUNDI VITATU VYA UMWAGILIAJI IKIWA NI SEHEMU YA ASILIMIA 10 MCHANGO WAKE KWA WANAWAKE NA VIJANA..

Posted on: August 18th, 2018

Halmashauri ya Wilaya ya Nyasa inatarajia kugawa mbolea kwa Vikundi Vitatu vya umwagiliaji katika bonde la Lundo vinavyojishughulisha na kilimo cha Mpunga hapo tarehe 20-08-2018.

Akizungumzia zoezi hilo Mkurugenzi Mtendaji wa Halmashauri ya Wilaya ya Nyasa Dkt. Oscar Albano Mbyuzi amesema kwamba katika kuhakikisha uzalishaji wa Mpunga Wilayani Unaongezeka wameamua kutoa Mifuko ya Mbolea 120 kwa vikundi vitatu (Mama Nilee, Upendo na Mwongozo Vijana) vya kilimo cha Mpunga ikiwa ni sehemu ya uchangiaji wa asilimia 10 ya Mapato yake kwa Wanawake na Vijana kama Miongozo na taratibu Mbalimbali za Bajeti zinavyotaka kwa kuanzia katika Bonde la umwagiliaji la Lundo ili kuongeza hamasa kwa vikundi vingine kuiga mfano wa vikundi hivyo ambavyo vimekuwa vikiongoza kwenye uzalishaji wa zao hilo Wilayani na hivyo kuipa Halmashauri uhakika wa kupata Mapato ya kutosha.  

Aidha Dkt.Mbyuzi aliwataka wananchi wa Lundo na Vitongoji vya jirani kujitokeza kwa wingi katika eneo la ugawaji ili pia kupata Nasaha na maneno ya Viongozi wa Wilaya na kupata uelewa mpana wa namna Serikali ya Awamu ya Tano inayoongozwa na Rais wetu Mpendwa Dkt. John Pombe Magufuli ilivyodhamilia kuwaondolea wananchi wake umasikini na kuifanya Tanzania kuwa Nchi ya Viwanda.