MAMLAKA ya Bandari Tanzania yaendelea kulipa fidia wananchi wa kitongoji cha Zambia,kupisha Ujenzi wa Barabara,Bandari ya Mbamba bay

Posted on: July 4th, 2024

Mamlaka ya Bandari Tanzania (TPA) inaendelea kulipa fidia Wananchi wa Kitongoji cha Zambia, Kata ya Mbamba bay, ili kupisha ujenzi wa Barabara, kuzunguka ujenzi wa Bandari ya Mbamba bay unaoendelea Wilayani hapa.

Mthamini wa Halmashauri ya Wilaya ya Nyasa Bi Sakina Mmaka ameyasema hayo wakati akitoa elimu katika Mkutano wa hadhara, wa wakazi wa kijiji hicho uliofanyika katika Kitongoji cha Zambia hivi karibuni Wilayani hapa.

Akiongea na wananchi katika Mkutano huu bi sakina amesema lengo la mkutano huo ni kutoa elimu kwa wananchi na sharia ikoje kuhusu utwaaji wa ardhi na kuwatangazia kuwa wananchi wanatakiwa kuwa tayari kupisha ujenzi huu wa barabara kwa kuwa ni maendeleo ya Nchi.

Hivyo ametoa wito kwa wananchi kuwa, wanatakiwa kukagua na kuorodhesha mali zao ambazo zipo katika maeneo ya ujenzi wa barabara na makaburi, ambayo yatatakiwa kuondolewa, hivyo kila mwananchi atatakiwa ajue idadi ya makaburi ya ndugu walkiozikwa, ili waweze kulipwa fidia na kuhamisha mabaki ya wapendwa wao kwa kulipwa fidia na Mamlaka ya Bandari Tanzania.

Wananchi wa Kitongoji cha Zambia mara baada ya kupata Elimu wamesema, wanampongeza Rais Samia Suluhu Hassan kwa kuleta fedha za ujenzi wa Bandari ambayo itawanufaisha wananchi, hivyo sisi kama wananchi tunamuunga mkono na mpaka hapa tulipofikia kila hatua tunashirikiana kikamilifu na hakuna changamoto.

Kwa Upande wake mamlaka ya bandari Tanzania imesema tayari kiwango cha Fidia kilishatengwa na mara baada ya Uthamuni kukamilika wananchi wote watalipwa ipasavyo.