TIMU YA UMISETA YAAGWA NYASA

Posted on: May 31st, 2019

Mkurugenzi Mtendaji wa Wilaya ya Nyasa Jimson Mhagama ameiaga timu ya michezo ya Wilaya ya Nyasa kwa wanafunzi wa shule za Sekondari kwa kuwataka warudi na ushindi ili kuitangaza vema Wilaya ya Nyasa.

Aliwaaga jana katika viwanja vya ofisi ya Mkurugenzi Mtendaji Wilaya ya Nyasa wakati Timu hiyo ikiwa na wachezaji 43 wa timu ya mpira wa miguu,pete,wavu na Riadha na walimu sita wakiambatana na Ofisa Taaluma Denis Katumbi,Ofisa michezo Frorence Msua na Ofisa Elimu Yona Mwaisaka amabaye ndiye mkuu wa msafara, unaoelekea manspaa ya Songea kwa ajili ya kushiriki mashindano ya Umiseta kwa ngazi ya Mkoa wa Ruvuma .

Mhagama alifafanua kuwa anawataka wanafunzi hao waende katika mashindano ya Umiseta na kuitangaza vema Halmashauri ya Wilaya ya Nyasa kwa kurudi na ushindi kwa kila mechi watakayokuwa wanacheza kwa kucheza kwa juhudi na maarifa na wakisharudi kutoka kwenye michezo hiyo wakazane kusoma kwa kuwa elimu ni ufunguo wa maisha .

“wanamichezo muone kuwa ni fahari kubwa kuchaguliwa kucheza michezo hii kwa ngazi ya Wilaya hivyo michezo inajenga urafiki kufahamiana na upendo,nawataka muende mkaiwakilishe vema Wilaya ya Nyasa kwa kushinda kila mechi mtakayokuwa mnacheza na mkirudi huko msome kwa bidii kwa kuwa elimu ni ufunguo wa maisha”

Awali,akimkaribisha Mkurugenzi Mtendaji wa Wilaya ya Nyasa, Ofisa elimu Sekondari Wilaya ya Nyasa Yona mwaisaka alisema Timu hiyo imefanya maandalizi ya kutosha na hawana shaka watafanya vizuri katika Mashindano hayo ya Umiseta yanayofanyika Kimkoa katika Manspaa ya Songea.